ადგილობრივი მოსახლეობის მხარდაჭერისა და სოციალური დაცვის პროგრამის ფარგლებში, ხადის ხეობის მოსახლეობის უფასო სამედიცინო პროფილაქტიკური შემოწმება გრძელდება.

სამედიცინო აქცია საქართველოს მთავრობის ადმინისტრაციის რეგიონებთან ურთიერთობის დეპარტამენტის, მცხეთა-მთიანეთის სამხარეო ადმინისტრაციისა და დუშეთის მუნიციპალიტეტის მერიის უშუალო ჩართულობით, ქვეშეთი-კობის ახალი გზის პროექტის მხარდაჭერითა და ორგანიზებით განხორციელდა.

აქციის ფარგლებში, უკვე მესამედ, ხადის ხეობას კლინიკა „რემედიქალის“ სხვადასხვა პროფილის ექიმები ეწვივნენ და მთელი დღის განმავლობაში, ქვეშეთის ამბულატორიულ ცენტრში მსურველებს კონსულტაციას უწევდნენ.

უფასო კონსულტაციები ჩაატარეს შემდეგი პროფილის ექიმებმა: ტრიაჟის ექიმი, თერაპევტი, კარდიოლოგი, ენდოკრინოლოგი, ნევროლოგი, ზოგადი ქირურგი, სისხლძარღვთა ქირურგი, ექიმი-ექოსკოპისტი.

ამასთან, ქვეშეთის ამბოლატორიული ცენტრი მომარაგებული იყო სხვადასხვა მედიკამენტითაც, რომლებიც, საჭიროების მიხედვით, ადგილობრივებს გადაეცათ.

აღსანიშნავია, რომ პაციენტებთან, რომლებმაც ქვეშეთის ამბულატორიაში მისვლა, ჯანმრთელობის პრობლემების გამო, ვერ მოახერხეს, ექიმები მათთან თავად მივიდნენ და კონსულტაცია გაუწიეს.

ჯამში აქციაში მონაწილეობა 70-ზე მეტმა ბენეფიციარმა მიიღო.

ბენეფიციარები გამოვლინდნენ წინასწარი კვლევით, რომელიც ხადის ხეობაში „რეგიონული განვითარების ახალგაზრდულმა ცენტრმა“ ჩაატარა.

ცნობისათვის, აღნიშნული სამედიცინო აქცია პენსიონერების მხარდაჭერის პროგრამის ნაწილს წარმოადგენს.