ტრადიციად ქცეული ფორმატის მიხედვით, წელს ღონისძიების მასპინძელი მცხეთა-მთიანეთის მხარე იყო.

ღონისძიების ფარგლებში, ილია ჭავჭავაძის საგურამოს სახელმწიფო მუზეუმში მისულ სტუმრებს მრავალფეროვანი აქტივობები დახვდათ.

მათ შორის მოეწყო საგამოფენო სივრცე, ეთნოგრაფიული კუთხე, ე.წ. სამზარეულოს ნაწილი და მასტერკლასები, ხოლო საღამო გაგრძელდა გალა-კონცერტით, რომელშიც მონაწილეობას რეგიონის მუსიკალური და ქორეოგრაფიული ანსამბლები იღებდნენ. დუშეთის მუნიციპალიტეტიდან ღონისძიებაზე წარმოდგენილი იყო ილია ზაქაიძის სახელობის კულტურის სახლთან არსებულ ანსამბლ "ქალილოს", იაკობ ტრიპოლსკის სახელობის სახალხო თეატრის, ა(ა)იპ კულტურულ-საგანმანათლებლო ცენტრის მხატვრული წრის მოსწავლეების შემოქმედება.

ღონისძიებას, შეკრებილ საზოგადოებასთან ერთად, მცხეთა-მთიანეთის მხარის სახელმწიფო რწმუნებული დავით ნოზაძე, რწმუნებულის მოადგილეები, დუშეთის მუნიციპალიტეტის მერი მაცაცო ნარიმანიძე, საკრებულოს სოციალურ და კულტურის საკითხთა კომისიის თავმჯდომარე გიორგი ასლამაზიშვილი და რეგიონის მუნიციპალიტეტების ხელმძღვანელი პირები ესწრებოდნენ.

"2 აგვისტოს სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის ანგელოზის დღე, წინასწარმეტყველ ელია თეზბიტელისა და, ასევე, ილია მართლის ხსენების დღეა.

ყოველ 2 აგვისტოს, ილიას მუზეუმი, საქართველოს სხვადასხვა რეგიონებიდან ჩამოსულ სტუმრებს მასპინძლობს. ისინი ერთი დღით ხდებიან საგურამოს სახლის მასპინძლები ნიშნად იმისა, რომ ილია ჭავჭავაძე არის ერთიანი საქართველოს სიმბოლო და მისი სახლი სრულიად საქართველოსია."- განაცხადა დავით ნოზაძემ.