ცერემონიაზე შეკრებილ საზოგადოებას დუშეთის მუნიციპალიტეტის მერმა მაცაცო ნარიმანიძემ, საკრებულოს სოციალურ და კულტურის საკითხთა კომისიის თავმჯდომარემ გიორგი ასლამაზიშვილმა და "მასტერ ლიგა 7x7-ზე" ფეხბურთის ასოციაციის პრეზიდენტმა აკაკი ხლაბუსტოვმა მიმართეს.

"ახალგაზრდებზე ზრუნვა და ჯანსაღი ცხოვრების პოპულარიზაცია ჩვენი მუდმივი პრიორიტეტია და ნამდვილად აღსანიშნავი ამბავია, რომ ამ მიმართულებით ქალაქ დუშეთს "მასტერ-ლიგის" სტანდარტების მქონე სივრცე შეემატა, რომელიც ყოველ შაბათ-კვირას სხვადასხვა აქტივობებს უმასპინძლებს" - განაცხადა მაცაცო ნარიმანიძემ.

"მიხარია, რომ მასტერ-ლიგის 2023 წლის სეზონმა ქალაქ დუშეთში აიღო სტარტი, სადაც ყველა პირობაა შექმნილი, იმისათვის რომ ახალგაზრდები აქტიური სპორტული ცხოვრებით დაკავდნენ" - აღნიშნა 7x7 ფეხბურთის ასოციაციის პრეზიდენტმა აკაკი ხლაბუსტოვმა.

სპორტულ მოედანზე პირველი თამაში დუშეთის "კოსმოსა" და ბორჯომის "ტორის" შორის გაიმართა, რომელიც "კოსმოს გამარჯვებით 3:0 დასრულდა.

გიორგი ასლამაზიშვილმა და მაცაცო ნარიმანიძემ დუშეთის "კოსმოს" დაარსებიდან 1 წლის იუბილე მიულოცეს და მის მოთამაშეებს სიმბოლური სიგელები გადასცეს, ხოლო გასული სეზონის საუკეთესო მოთამაშე ზურაბ ზვიადაური დუშეთის მუნიციპალიტეტისაგან სპეციალური საჩუქრით დაჯილდოვდა.

ცნობისათვის, ნახევარმილიონიანი პროექტის ფარგლებში, სტადიონზე ️დაიგო ხელოვნური საფარი, მოეწყო ტრიბუნები და განათება. პროექტი რეგიონებში განსახორციელებელი პროექტების ფონდიდან და ადგილობრივი ბიუჯეტიდან დაფინანსდა.

26 მაისთან დაკავშირებით, დუშეთის მუნიციპალიტეტის მერიის, საკრებულოს და ა(ა)იპ დუშეთის კულტურულ-საგანმანათლებლო ცენტრის ორგანიზებით, მთელი დღის განმავლობაში, სხვადასხვა სახის აქტივობები მიმდინარეობდა:

ქალაქ დუშეთის შემოსასვლელში, აფხაზეთში დაღუპულ მეომართა მემორიალზე სახელმწიფო ჰიმნის თანხლებით საზეიმოდ აღიმართა საქართველოს დროშა.

ქალაქის ცენტრალურ მოედანზე მოეწყო 1918 წლის მოვლენებთან დაკავშირებული ფოტოგამოფენა.

ბაზალეთის ტბის მიმდებარედ გაიმართა ტრადიციული დოღი, რომლის გამარჯვებულებსაც მუნიციპალიტეტისგან სიგელები და სიმბოლური საჩუქრები გადაეცათ;

ქალაქ დუშეთის საჭიდაო არენაზე აგრეთვე გაიმართა ტურნირი ქართულ ჭიდაობაში, ხოლო კულტურის ცენტრში შეჯიბრი მოყვარულ მოჭადრაკეებს შორის;

დღის ბოლოს ილია ზაქაიძის სახელობის დუშეთის კულტურის სახლის სცენაზე მოყვარულმა მსახიობებმა საქართველოს ისტორიის გამორჩეული მომენტები ნანა კაიშაურის საავტორო სპექტაკლით "კიდევაც დაიზრდებიან" წარმოადგინეს.

ღონისძიებას ადგილობრივ საზოგადოებასთან ერთად ესწრებოდნენ: დუშეთის მუნიციპალიტეტის მერი მაცაცო ნარიმანიძე, მცხეთა-მთიანეთის მხარის სახელმწიფო რწმუნებულის მოადგილეები გიორგი ჩიფჩიური და გიორგი კაპანაძე, მუნიციპალიტეტის საკრებულოს თავმჯდომარე კახაბერ ჩიტაური და საკრებულოს სოციალურ და კულტურის საკითხთა კომისიის თავმჯდომარე გიორგი ასლამაზიშვილი.

"ყველას გილოცავთ საქართველოს დამოუკიდებლობის დღეს, რომლის მოპოვებასაც, საუკუნეების განმავლობაში უამრავი ქართველის სიცოცხლე შეეწირა. თავისუფლების ამ დიდ მონაპოვარს კვლავ შრომა და გაფრთხილება სჭირდება და მჯერა რომ მომავალი თაობა ამას ნამდვილად შეძლებს" - განაცხადა მაცაცო ნარიმანიძემ.

ლაფანაანთკარის ადმინისტრაციულ ერთეულში აბანოსხევი-ლაფანაანთკარის დამაკავშირებელი საავტომობილო გზის სამშენებლო სამუშაოები დასრულდა.

პროექტის ფარგლებში, რომლის ღირებულება 1 930 000 ლარს აღემატება, 4.4 კმ-იან გზის მონაკვეთზე დაეგო ასფალტის საფარი და მოეწყო სანიაღვრე არხები.

დასრულებულ სამუშაოებს ადგილზე გაეცნენ მცხეთა-მთიანეთის მხარის სახელმწიფო რწმუნებული დავით ნოზაძე, დუშეთის მუნიციპალიტეტის მერი მაცაცო ნარიმანიძე და მერის მოადგილე ოთარ ჩხეიძე.

ამასთან, რეგიონისა და მუნიციპალიტეტის ხელმძღვანელი პირები ადგილობრივ მაცხოვრებლებს შეხვდნენ და მათ საჭიროებებს გაეცნენ.

"წლების განმავლობაში ძალიან გაუვალი და გრუნტიანი გზა იყო აქ და წვიმის დროს საერთოდ შეუძლებელი ხდებოდა გადაადგილება, რაც პრობლემას ქმნიდა როგორც მოსახლეობისათვის, ისე სასწრაფო-სამედიცინო და სახანძრო-სამაშველო სამსახურებისათვის. დღეს კი ასფალტის საფარის მოწყობის შედეგად ჩვენს მოქალაქეებს შეუძლიათ უსაფრთხოდ და კომფორტულად გადაადგილდნენ." - განაცხადა მაცაცო ნარიმანიძემ.

"საგზაო ინფრასტრუქტურის კეთილმოწყობის საკითხი, როგორც არაერთხელ აღვნიშნეთ, ჩვენს პრიორიტეტებს შორისაა. შესაბამისად, აღნიშნული მიმართულებით, რეგიონის მასშტაბით, სხვადასხვა ლოკაციაზე სამუშაოები ინტენსიურად ხორციელდება. მნიშვნელოვანია, რომ უკვე დასრულდა სოფლების - აბანოსხევი-ლაფანაანთკარის დამაკავშირებელი გზის სამშენებლო სამუშაოები. მოსახლეობას აქ დიდი ხნის განმავლობაში მოუწესრიგებელ გზაზე უწევდა გადაადგილება, თუმცა განხორციელებული ღონისძიებების შედეგად, პრობლემა გადაიჭრა და ადგილზე ბევრად კომფორტული და უსაფრთხო გარემო შეიქმნა," - აღნიშნა დავით ნოზაძემ.

ცნობისათვის, აბანოსხევი-ლაფანაანთკარის დამაკავშირებელი საავტომობილო გზის სამშენებლო სამუშაოები რეგიონებში განსახორციელებელი პროექტების ფონდიდან და მთის განვითარების ფონდიდან, ადგილობრივი ბიუჯეტის თანადაფინანსებით განხორციელდა.

ბიომრავალფეროვნების საერთაშორისო დღესთან დაკავშირებით, დუშეთის მუნიციპალიტეტის მერმა მაცაცო ნარიმანიძემ ქალაქ დუშეთის N1 საჯარო სკოლის მოსწავლეებს და მათ პედაგოგს მარინა კახიშვილს უმასპინძლა.

ამ დღის აღსანიშნავად, მოსწავლეებმა მერს წარუდგინეს პრეზენტაცია თემაზე: “ფშავ-ხევსურეთის ეროვნული პარკის წითელი ნუსხის სახეობები და ბიომრავალფეროვნება". აღნიშნული თემის ფარგლებში მათ ასევე განიხილეს შემდეგი საკითხები: ბიომრავალფეროვნება და საქართველო, არსებული საფრთხეები და დაცვის მექანიზმები.

მოსწავლეები აგრეთვე შეხვდნენ დუშეთის მუნიციპალიტეტის საკრებულოს თავმჯდომარეს კახაბერ ჩიტაურს და თავმჯდომარის მოადგილეს გვანცა ესტატიშვილს, რომელთაც ამ თემაზე შექმნილი საინფორმაციო ბროშურები გადასცეს.

ცნობისათვის, ბიომრავალფეროვნების საერთაშორისო დღე 22 მაისს 2000 წლიდან აღინიშნება და მიზნად ისახავს, ბიომრავალფეროვნების დაცვის პოპულარიზაციას, ცნობიერების ამაღლებასა და მისი მნიშვნელობის გაგებას.